મ્યુઝિક લવર્સ માટે ગુડન્યૂઝ છે. આખી દુનિયા જેની દિવાની છે તે કોલ્ડપ્લેનો કોન્સર્ટ અમદાવાદમાં યોજાશે. 25મી જાન્યુઆરીએ નરેન્દ્ર મોદી સ્ટેડિયમમાં સંગીતનો આ ભવ્ય જલસો યોજાશે. આ સાથે જ 16મી નવેમ્બરથી બૂક માય શો પર ઓનલાઈન ટિકિટનું વેચાણ થશે. ડીબી ડિજીટલના અહેવાલ પ્રમાણે કોલ્ડપ્લે બેન્ડની શરૂઆત 1997માં લંડનથી થઈ હતી અને અત્યાર સુધીમાં 7 ગ્રેમી એવોર્ડ જીત્યા છે. બેન્ડમાં ક્રિસ માર્ટિન, જોની બકલેન્ડ, ગાય બેરીમેન, વિલ ચેમ્પિયન અને ફિલ હાર્વે સહિતના મેમ્બર્સ છે.
18,19 અને 21મીએ મુંબઈમાં યોજાશે કોલ્ડપ્લેની કોન્સર્ટ:
18, 19 અને 21મી જાન્યુઆરીના રોજ મુંબઈમાં કોલ્ડપ્લેની ત્રણ કોન્સર્ટ યોજાશે. ક્યાર પછી અમદાવાદમાં 25મી જાન્યુઆરીએ આ કોન્સર્ટ યોજાશે. અગાઉ મુંબઈમાં કોન્સર્ટની જાહેરાત થતાં જ ભારે ધસારાના કારણે અનેક લોકોને ટિકિટ મળી નહોતી. ઓનલાઈન બુકિંગમાં લાખો મ્યુઝિક લવર્સ વેઇટિંગ લિસ્ટમાં હતાં અને ટિકિટ ન મળતા તેઓ નિરાશ થયા હતા.
9 વર્ષ પછી ભારતમાં આવે છે કોલ્ડપ્લે:
અગાઉ 2016માં મુંબઈમાં યોજાયેલા ગોલ્ડન સિટિઝન ફેસ્ટિવલમાં કોલ્ડપ્લે કોન્સર્ટ યોજાઈ હતી. જેમાં 70 હજારથી વધુ લોકો જોડાયા હતાં. હવે 9 વર્ષ પછી બેન્ડ ફરી ભારતમાં આવે છે ત્યારે કોલ્ડપ્લેનાં ગીતો ‘હાયમ્ન ફોર ધ વીકેન્ડ’, ‘યેલો’, ‘ફિક્સ યૂ’ ભારતમાં ખૂબ જ લોકપ્રિય છે.
મુંબઈમાં ત્રણ શો હાઉસફુલ હવે અમદાવાદનો વારો:
મુંબઈમાં કોલ્ડપ્લે કોન્સર્ટનાં ત્રણ શો હાઉસફુલ થઈ ગયા છે. એ જ રીતે હવે અમદાવાદમાં કોન્સર્ટની જાહેરાત થતાં શહેરની હોટલો હાઉસફુલ થઈ જશે. નરેન્દ્ર મોદી સ્ટેડિયમમાં 1.25 લાખ જેટલી કેપેસિટી છે એટલે મ્યુઝિક રસિકોનું ધોડાપૂર ઊમટે તેવી શક્યતા છે.
