International kite Festival 2025@Ahmedabad:અમદાવાદ ગુજરાતની આગવી ઓળખ સમાન ઇન્ટરનેશનલ કાઇટ ફેસ્ટિવલનો 11 જાન્યુઆરીથી પ્રારંભ થયો છે. શહેરના રિવરફ્રન્ટ પર યોજાઈ રહેલા પતંગોત્સવનો મુખ્યમંત્રી ભૂપેન્દ્ર પટેલની ઉપસ્થિતીમાં ખુલ્લો મૂકવામાં આવ્યો હતો. આ સાથે મુખ્યમંત્રીએ પણ પતંગ પર હાથ અજમાવ્યો હતો. અમદાવાદના આંગણે શરૂ થયેલા આંતરરાષ્ટ્રીય પતંગોત્સવમાં ભાગ લેવા માટે દેશનાં 11 રાજ્યમાંથી 52 અને 47 દેશમાંથી 140થી વધુ પતંગબાજો આવી પહોંચ્યા છે. અમદાવાદ રિવરફ્રન્ટના આકાશમાં રંગબેરંગી પતંગો છવાયેલા જોવા મળ્યા હતા. અવનવા પતંગો નિહાળવા માટે મોટી સંખ્યામાં શહેરીજનો પણ બાળકો સાથે પહોંચ્યાં હતાં.
ઈન્ડોનેશિયાના કાઈટ ફ્લાયર દ્વારા મુખ્યમંત્રીને પતંગ ગિફ્ટ કરાયો:
ઇન્ડોનેશિયાના કાઈટફ્લાયર દ્વારા એક જૂનો પતંગ રાજ્યના મુખ્યમંત્રી ભુપેન્દ્ર પટેલને આપ્યો હતો. ઇન્ડોનેશિયાના એક આઇલેન્ડ પર આ પતંગ બનાવવામાં આવ્યો હોવાનું પતંગબાજે એક વાતચીતમાં કહ્યું હતું.
ક્રિએટીવ શેપવાળી અનેક પતંગો આકર્ષણ જમાવશે:
આંતરરાષ્ટ્રીય પતંગ મહોત્સવના આયોજન થકી રાષ્ટ્રીય અને આંતરરાષ્ટ્રીય સ્તરે રાજ્યના વિવિધ પ્રવાસન સ્થળો પ્રમોટ થાય છે, જેના થકી પ્રવાસીઓની સંખ્યામાં વધારો થયો છે. દેશ-વિદેશમાંથી ગુજરાત આવતા પતંગબાજો અને તેમની અવનવા આકારોવાળી રંગબેરંગી પતંગો આંતરરાષ્ટ્રીય પતંગ મહોત્સવનું મુખ્ય આકર્ષણ હોય છે.
ઈન્ટરનેશનલ કાઈટ ફેસ્ટિવલમાં દુનિયાભરમાંથી ઈન્ટરનેશનલ કાઈટ ફ્લાયર અમદાવાદમાં આવી પહોંચે છે અને પતંગ ઉડાડે છે.
