Our selection also falters: Salman Khan addresses Bigg Boss 20 casting backlash: સલમાન ખાન હોસ્ટ કરેલા ‘બિગ બોસ સિઝન 20’નો પ્રારંભ 6 સપ્ટેમ્બરના રોજ થયો હતો. દર્શકો સ્પર્ધકોની નવી યાદી જોવા માટે ઉત્સાહિત હતા, પરંતુ ટેલિવિઝન અને ફિલ્મ જગતના માત્ર ગણ્યાગાંઠ્યા જાણીતા ચહેરાઓને જ સ્થાન મળતાં ઘણા લોકોને નિરાશા થઈ હતી. આ મહત્ત્વપૂર્ણ સિઝન પ્રથમ સપ્તાહમાં કોઈ ખાસ પ્રભાવ પાડવામાં નિષ્ફળ રહી, જેના કારણે સ્પર્ધકો અને યાદગાર ક્ષણોના અભાવને લઈને શોની ભારે ટીકા થઈ હતી. લોકોના આ વિરોધ વચ્ચે સલમાન ખાને ઘરના સભ્યોને સજાગ કર્યા હતા અને સિઝનના પ્રથમ ‘વીકેન્ડ કા વાર’ દરમિયાન શોની કાસ્ટિંગ પ્રક્રિયા વિશે પણ ખુલીને વાત કરી હતી. The Indian Expressના એક રિપોર્ટમાં આમ જણાવાયુ હતું.
વીકેન્ડ દરમિયાન સ્પર્ધકો સાથેની વાતચીતમાં સલમાને આ વર્ષના કન્ટેસ્ટન્ટ્સ સામે થઈ રહેલા વિરોધનો જવાબ આપ્યો હતો. ‘બિગ બોસ 20’ના હોસ્ટે કહ્યું, “અમે વિચાર્યું હતું કે અમે ઉત્તમ સ્પર્ધકોની પસંદગી કરીશું, પરંતુ ક્યારેક અમારી પસંદગી પણ ખોટી પડે છે. જે લોકો શોમાં દેખાતા નથી, તેમનો બચાવ એવો હોય છે કે તેઓ રમતમાં ઘણું બધું કરી રહ્યા છે, પણ હકીકત એ છે કે તમે જે બોલી રહ્યા છો કે કરી રહ્યા છો તે પ્રસારિત કરવા યોગ્ય (એર કરવા લાયક) નથી.”
ત્યારબાદ સલમાને દરેક સ્પર્ધક તરફ ધ્યાન દોર્યું અને પોતાની ક્ષમતા અનુસાર પ્રદર્શન ન કરવા બદલ તેમને આડે હાથ લીધા. “અમન, તારે ‘મેઈન કેરેક્ટર એનર્જી’ બનવું હતું ને? તો પછી તું એક ‘કેરેક્ટર આર્ટિસ્ટ’ની જેમ કેમ ફરી રહ્યો છે? તું માત્ર પાસિંગ શોટ્સ જ આપી રહ્યો છે, તો પછી એમાં બીજા બધાનો વાંક કેમ છે અને તારો કેમ નથી? આખી દુનિયાને દોષ દેવા કરતાં કોઈએ એવું વિચાર્યું છે કે જો તેઓ કોઈ ખાસ મુકામે ન પહોંચી શક્યા તો તે તેમની પોતાની ભૂલ હોઈ શકે? દુનિયામાં ઘણા સુંદર લોકો છે. ઉદિતિ, તને તારા લુક્સના કારણે અહીં લાવવામાં આવી નથી. તને તારા વ્યક્તિત્વના કારણે પસંદ કરવામાં આવી છે. ટીમ તારાથી ખૂબ પ્રભાવિત થઈ હતી, એટલે તું આ શોમાં છે.”
બિગ બોસની કાસ્ટિંગ પ્રક્રિયા પર સલમાન ખાન:
સલમાન ખાને શોની કાસ્ટિંગ પ્રક્રિયા પર પણ પ્રકાશ પાડતાં કહ્યું, “હજારો લોકો એવા હોય છે જેમને બિગ બોસની ટીમ મળે છે અને તેમના ઈન્ટરવ્યુ લે છે. તેમાંથી તમારા 16 લોકોની પસંદગી કરવામાં આવી છે. અલગ-અલગ ક્ષેત્રના સેલેબ્સને નક્કી કરવામાં ટીમને આઠ મહિનાનો સમય લાગે છે. જેમ કે, ઘણા લોકો સ્કાઉટ ઓપીને તેના ક્ષેત્રમાં ઓળખે છે, પરંતુ હવે બીજા લોકો પણ તેને ઓળખશે. રોહેદ ઑસ્ટ્રિયાથી છે; હવે લોકો તેને પણ ઓળખશે. અમે જીવનના વિવિધ ક્ષેત્રોમાંથી લોકોને પસંદ કર્યા છે. જ્યારે તમે લોકો અહીં આવ્યા ત્યારે લોકો પૂછતા હતા કે આ કેવું કાસ્ટિંગ છે, પરંતુ એક અઠવાડિયા પછી હવે દરેક લોકો કેટલાક પાત્રોને પસંદ કરી રહ્યા છે. કેટલાક લોકો પ્રથમ સપ્તાહમાં જ પોતાના વિશેની નકારાત્મક છાપ બદલવામાં સફળ રહ્યા છે. બાકીના લોકોએ પણ આવું જ કરવું જોઈએ.”
સલમાને આગળ ઉમેર્યું, “રીતિ, અત્યારે તું આ ઘરમાં એક પથ્થર જેવી છે જેના પર ટૂંક સમયમાં શેવાળ જામી જશે. રોહેદ, તું અહીં લોકોના દિલ જીતવા આવ્યો હતો, પરંતુ મને તું 2-3 એપિસોડમાં દેખાયો પણ નથી. તને તો એલી અવરામ કે નતાલિયા જેનોઝેક જેવી ભાષાની કોઈ સમસ્યા પણ નથી. બિગ બોસની પરંપરા રહી છે કે શોમાં જોડાનાર દરેક વ્યક્તિ પહેલેથી જ સ્ટાર હોય તે જરૂરી નથી; તેઓ અહીં પોતાના વ્યક્તિત્વ માટે આવે છે. જે લોકો સેલિબ્રિટી નથી તેમને બિગ બોસના ઘરમાં આવીને પોતાની પ્રતિભા બતાવવાની અને શોમાંથી બહાર નીકળતી વખતે સ્ટાર બનવાની ઉત્તમ તક મળે છે. હવેથી તમારું સાચું વ્યક્તિત્વ દેખાવાનું શરૂ થશે. હું અહીં તમારો ન્યાય કરવા નથી આવ્યો. હું ફક્ત મારા વિચારો રજૂ કરીશ, પરંતુ હું ઇચ્છું છું કે તમે બધા તકને ઝડપી લો, માત્ર તક સામે ચાલીને આવે તેની રાહ જોઈને બેસી ન રહો.”
‘બિગ બોસ 20’માં માહી વિજ, આસિફ ખાન, આમ્રપાલી દુબે, અમન ગાંધી, કનિકા માન, સ્કાઉટ ઓપી, યંગ ડીએસએ, રોહેદ ખાન, અરિશફા ખાન, રીતિ તિવારી, ઇશા રિકી, ઉદિતિ સિંહ, કાઝી તૌકીર, લવ ગિલ, મેરી કોમ અને કુશાલ તંવર ઉર્ફે ગુલ્લુ સામેલ છે. આ નવી સિઝન દર સોમવારથી રવિવાર રાત્રે 9 વાગ્યે ‘JioHotstar’ પર સ્ટ્રીમ થાય છે અને રાત્રે 10.30 વાગ્યે ‘Colors TV’ પર પ્રસારિત થાય છે.
