Salman Khan on Sohail Khan and Seema Sajdeh divorce: He took all the blame: બોલિવૂડ સુપરસ્ટાર સલમાન ખાને રિયાલિટી શો ‘એલાયન્સ’ (Alliance) પર કહ્યું કે તેના ભાઈ અને અભિનેતા સોહેલ ખાને ફેશન ડિઝાઇનર સીમા સજદેહ સાથેના છૂટાછેડાનો બધો દોષ પોતાના માથે લઈ લીધો હતો. સોહેલના સમર્થનમાં શોમાં એન્ટ્રી લેતા 60 વર્ષીય સલમાને સોહેલ દ્વારા સીમા અંગે તાજેતરમાં કરાયેલી ટિપ્પણીઓનો ઉલ્લેખ કર્યો હતો અને કહ્યું હતું કે તે જાણે છે કે તેનો ભાઈ માનસિક રીતે પરિસ્થિતિને સંભાળવા માટે કેટલી મહેનત કરી રહ્યો છે. India Todayના અહેવાલમાં આમ જણાવાયું હતું.
બે દાયકાથી વધુ સમય સાથે રહ્યા બાદ 2022માં પોતાના લગ્નજીવનનો અંત આણનાર સોહેલ અને સીમા આજે પણ મૈત્રીપૂર્ણ સંબંધ ધરાવે છે અને પોતાના પુત્રો – નિર્વાણ અને યોહાનનું સાથે મળીને પાલન-પોષણ (co-parenting) કરી રહ્યા છે. થોડા અઠવાડિયા પહેલા સીમાએ શોમાં વાઇલ્ડ કાર્ડ સ્પર્ધક તરીકે પ્રવેશ કર્યો હતો, ત્યારબાદ તેમના સંબંધો ચર્ચાનો વિષય બન્યા હતા. થોડા દિવસો પછી શોમાંથી બહાર થતાં પહેલાં બંનેએ પોતાના ભૂતકાળ વિશે ખુલ્લીને વાત કરી હતી.
‘એલાયન્સ’ પર સોહેલ સાથે વાત કરતાં સલમાને કહ્યું, “શું તું હજુ પણ સીમાનું સાંભળે છે? મારા ઉદાર ભાઈએ બધો વાંક પોતાના માથે લઈ લીધો. પણ એક ભાઈ તરીકે હું જાણું છું કે તે કેટલો પ્રયત્ન કરી રહ્યો છે. હું જાણું છું કે તે લાગણીશીલ રીતે બધું ચલાવી રહ્યો છે અને સહન કરી રહ્યો છે.”
તેમના લગ્નજીવન અંગે અગાઉ કરેલી કમેન્ટસઃ
આ પહેલા શોમાં સોહેલે સીમા સાથેના પોતાના વણસેલા સંબંધો વિશે વાત કરીને ઘણા લોકોને ચોંકાવી દીધા હતા. તેણે કહ્યું હતું કે, “હું આ સુંદર મહિલા સાથે 25 વર્ષ રહ્યો છું, અને હું નેશનલ ટેલિવિઝન પર સ્વીકારું છું કે: જો અમારા બંને વચ્ચે કોઈ પણ ભૂલ થઈ હશે, તો હું તેની જવાબદારી લઉં છું.”
પોતાના અલગ થવા વિશે વધુ વાત કરતા સોહેલે કહ્યું, “એ સમયે મારું કામ સરખું નહોતું ચાલી રહ્યું, તેથી મારી માનસિક સ્થિતિ સારી નહોતી. મારા વર્તનને કારણે મેં એવી વ્યક્તિને ગુમાવી દીધી જેને હું ખરેખર પ્રેમ કરતો હતો.”
તેણે ઉમેર્યું, “તે મારા બે સુંદર બાળકોની માતા છે, તેથી પ્રેમથી પણ વધુ મને સીમા માટે ખૂબ જ માન છે. આ શો મારા માટે હંમેશા યાદગાર રહેશે. ભલે અમે અલગ થઈ ગયા છીએ, પણ આ શોએ અમને ફરી એકબીજા સાથે વાત કરવા અને દિલ ખોલીને ચર્ચા કરવા માટે સાથે લાવ્યા છે. અમારા વચ્ચે એક કડી ખૂટતી હતી, અને આ શોએ તેને ફરી જોડવામાં મદદ કરી છે.”
સીમાએ પણ શોમાં કહ્યું હતું કે તેમનો નાનો પુત્ર યોહાન તેને સપોર્ટ કરી રહ્યો હતો, જ્યારે તેમનો મોટો પુત્ર નિર્વાણ ઈચ્છતો હતો કે સોહેલ આ સ્પર્ધા જીતે.
સીમાની શોમાંથી બહાર થવા અને સોહેલની રમત પર પ્રતિક્રિયાઃ
કેટલાક પ્રેક્ષકોને લાગ્યું કે સીમા સોહેલ કરતાં વધુ મજબૂત ખેલાડી હતી અને તેણે શોમાં રહેવું જોઈતું હતું, પરંતુ સીમા આ વાત સાથે અસહમત હતી. શોમાંથી બહાર આવ્યા પછી, તેણે ‘ઈન્ડિયા ટુડે’ને કહ્યું, “સોહેલ રણનીતિ બનાવવામાં બહુ હોંશિયાર નહોતો, પણ શારીરિક કાર્યોમાં તે મજબૂત હતો. દરેક તેને પ્રેમ કરતા હતા. ગેમ તો માત્ર 30 મિનિટની જ હતી; બાકીનો આખો દિવસ જોડાણ (alliances) બનાવવાનો હતો, અને તેણે તે કામ ખૂબ સારી રીતે કર્યું.”
સોહેલે અગાઉ કહ્યું હતું કે સીમા વગર તે આ ગેમમાં ટકી શક્યો ન હોત. પરંતુ જ્યારે સીમાને પૂછવામાં આવ્યું કે હેડક્વાર્ટર્સની અંદર તે લાગણીશીલ રીતે કોના પર નિર્ભર હતી, ત્યારે તેણે કહ્યું, “સાચું કહું તો, સોહેલ માટે આ ગેમ અને કેદમાં રહેવું ખૂબ જ મુશ્કેલ બની રહ્યું હતું કારણ કે તે તેની કમ્ફર્ટ ઝોનની બહાર હતું. મને ખરેખર કોઈની જરૂર નહોતી કારણ કે હું ખૂબ જ મજબૂત છું અને સારા મિત્રો બનાવવામાં સફળ રહી. સાચે જ, મને ખૂબ મજા આવી.”
સીમાએ આ અટકળો પર પણ વાત કરી કે શું ‘એલાયન્સ’ શોએ તેને અને સોહેલને ફરી નજીક લાવ્યા છે. તેણે કહ્યું કે આ શોએ લોકોને માત્ર એ જ સંબંધ બતાવ્યો છે જે તેમણે માતાપિતા તરીકે આટલા વર્ષોમાં કેળવ્યો છે.
